माध्यमिक विद्यालय कलिला सिक्ने उमेरका विद्यार्थीहरूलाई ज्ञान, सीप र संस्कार प्रदान गर्ने महत्वपूर्ण थलो हो । विद्यालय शिक्षाले व्यक्तिलाई अघि बढ्न विभिन्न क्षेत्रमा वृत्ति विकासको द्वार खोली दिन्छ । ज्ञानलाई प्रमाणपत्रका ठेली र जीवन चलाउने साधनको रूपमा मात्र लिन सकिँदैन । त्यहाँको भूगोलले प्रदान गरेको ज्ञान, सामाजिक रीतिरिवाजले प्रदान गरेको ज्ञान, स्थानीय वातावरणले प्रदान गरेको ज्ञान, नजाने अन्य कैयन यस्ता वस्तुस्थितिले प्रदान गरेको ज्ञान, सीप र आदतले व्यक्तिका प्रतिभा प्रस्फुटन र व्यक्तित्व निर्माणमा अहम भूमिका खेलेका हुन्छन् । हुर्कँदै गरेका विद्यार्थीलाई विद्यालयले पहिचान दिलाइरहेको हुन्छ जसलाई जीवनका धेरै क्षणहरूमा कुनै न कुनै किसिमले अनुभव गरिन्छ । यसैले संगठित रूपमा ज्ञानको ढोका प्रवेश गराएको विद्यालयप्रति जो कोही अनुग्रहित हुन्छ नै । तर समय र सामाजिक परिवेशले घेरिँदा चाहेर पनि हिजोका घनिष्ठ मित्रहरूबीच पनि एकआपसमा भौतिक रूपमा आवद्ध हुन कठिन हुने अवस्था हुन्छ । तथापि, स्थापित पहिचान र स्नेहले समयक्रममा अपनत्व जनाउन र सहयोगी भाव बढाउन निकै सहयोगी भूमिका खेलेको हुन्छ ।

भन्निन्छ समय र स्वास्थ्यको महत्व बितिसकेपछि बढी ज्ञात हुन्छ । विगतका अनुभव वर्तमानका पूँजी हुन सक्छन् । यी सम्बन्धका निरन्तरता र अनुभवका आदानप्रदान सामाजिक जीवनमा महत्वपूर्ण मानिन्छ । यसै सिलसिलामा वीरभक्तिमा अध्ययन गरी सकेका र देश–विदेशमा छरिएर रहेका पूर्व विद्यार्थीहरूबीच पनि एउटा मिलनको चौतारी र सुख–दुःख साट्ने मञ्चको खाँचो महसुस गरियो । वीरभक्तिको विद्यार्थी पहिचानलाई निरन्तरता दिँदै संस्थागत रूपमा जोडिँदा एकआपसको मित्रता र पहिचान अझ दरिलो बन्न सक्ने र संगठित शक्तिको समयोचित परिचालन गर्न सके यसले रचनात्मक परिणाम दिन सक्ने अभिप्रायले वीरभक्ति पूर्व विद्यार्थी समाज गठन गरिएको हो । वीरभक्ति पूर्व विद्यार्थी समाज वीरभक्ति मा.वि.मा कम्तिमा एक शैक्षिक सत्र अध्ययन गरेका र वर्तमानमा वीरभक्ति मा.वि.मा विद्यार्थी नरहेका पूर्व विद्यार्थीहरूको छाता संस्था हो ।

संस्था दर्ता त भयो, यसलाई निरन्तरता दिने र केही कार्यक्रमहरू पनि सञ्चालन हुँदै आएका छन्, तर पनि संस्थालाई सशक्त बनाउन सदस्यहरूको सार्थक सहभागिता अति आवश्यक हुन्छ । जुन विषय अझै टड्कारो रूपमा खड्कि रहेको छ । संस्थाको सांगठनिक र आर्थिक पक्ष सबल नभएसम्म उद्देश्य अनुरूपका उपलब्धिहरू हासिल हुन नसक्नु स्वाभाविक नै लाग्छ । यिनै पृष्ठभूमिमा भौतिक रूपमा नजिक रहेका हुन् वा टाढा, जहाँसुकै जुनसुकै रूपमा रहेका पूर्व विद्यार्थीहरूबीच सामाजिक सञ्जालको माध्यमबाट पनि सामिप्यता कायम गराई सूचना, विचार र सहयोगको सहज आदानप्रदान गरी रचनात्मक गतिविधिद्वारा समाजलाई सिर्जनशील बनाउने अभिप्रायले यही रूपमा भए पनि वीरभक्ति पूर्व विद्यार्थी समाजको यो वेबसाइट तयार गरिएको छ ।

हामीले यसलाई धेरैभन्दा धेरै सदस्यबीच सहज पुर्‍याउने सत्प्रयासको रूपमा लिएका छौँ । यसलाई समयअनुकूल सूचनामूलक र बोधगम्य बनाउन सदस्यहरू र सम्पूर्ण शुभेच्छुकको सुझाव एवम् साथ–सहयोग प्राप्त हुने विश्वास गरेका छौँ । समाज र वेबसाइटका सामग्रीबारे मित्रहरूको सुझाव लिन हाललाई समाजको लोगो अंकित फेसबुक पेज वा समाजका अध्यक्षको dineshtiwari21@gmail.com, वा कोषाध्यक्षको jeevanstha31@gmail.com, वा सदस्यको ranjitstha47@gmail.com इमेलमा आफ्ना प्रतिक्रिया पठाउनु हुन अनुरोध गर्दछौँ । आर्थिक सहभागिता गर्न इच्छुक मित्रहरूले वीरभक्ति पूर्व विद्यार्थी समाज, ग्लोबल आइएमई बैंक, सिउडिबार शाखा, खाता नं. ०९६०१०१०००३ मा सहयोग उपलब्ध गराउन सकिने व्यहोरा समेत अनुरोध गरिन्छ ।